TIRANË, 3 janar/ATSH/ Kryetari i Partisë Demokratike, Sali Berisha deklaroi sot se do ta respektojë vendimin e Gjykatës së Posaçme të Apelit për Korrupsionin dhe Krimin e Organizuar, e cila vendosi masën “detyrim paraqitjeje” për të.
Në një prononcim për mediet, Berisha tha se “është një vendim pa asnjë bazë ligjore, pilulë elektorale për të pashpresin Edi Rama. Përpjekje e dështuar e organizatës kriminale që quhet Skrapi i Partisë, për të justifikuar veprën e tyre dhe në këtë kontekst dëshmi e re e kontrollit të plotë dhe total të SKRAP-it nga Edi Rama, zbatimit të urdhrave të tij politikë”.
I pyetur nëse do ta respektonte vendimin, Berisha tha se “vendimin do ta respektoj, sepse çështjen tani, siç dihet, është në Gjykatën Ndërkombëtare të të Drejtave të Njeriut në Strasburg. Këtë rast do ta çojmë atje t’i shtohet dosjes”.
Gjykata e Posaçme e Apelit për Korrupsionin dhe Krimin e Organizuar mori sot vendimin për të lënë në “detyrim paraqitjeje” kreun e Partisë Demokratike, Sali Berisha.
/k.s/r.e/
