TIRANË, 26 nëntor /ATSH/ Ekipi i Fondit Monetar Ndërkombëtar (FMN), kryesuar nga Anke Weber, shefe e misionit dhe Sebastian Sosa, përfaqësues rajonal për Ballkanin Perëndimor, gjatë vizitës së tyre në Tiranë për Artikullin IV 2024, zhvilluan një takim pune me zv/ministrat e Ekonomisë, Kulturës dhe Inovacionit dhe ekspertët e MEKI.
Ministri i Ekonomisë, Kulturës dhe Inovacionit, Blendi Gonxhja ndau në rrjete sociale momente nga ky takim, teksa informoi mbi çështjet kryesore që u diskutuan në këtë tryezë.
“Në këtë takim të rëndësishëm diskutuam mbi Partneritetet Publike Private (PPP) – një model i rëndësishëm për investimet strategjike që mbështesin zhvillimin ekonomik, si dhe për ndërmarrjet shtetërore me pronar shtet duke analizuar sfidat dhe mundësitë për të përmirësuar menaxhimin dhe eficiencën e tyre”, shkroi Gonxhja.
Vizita nënvizoi bashkëpunimin e vazhdueshëm midis institucioneve shqiptare dhe FMN-së, me qëllimin e përbashkët për të ndërtuar politika të qëndrueshme që fuqizojnë ekonominë dhe promovojnë transparencën.
/r.e/a.f/
