TIRANË, 23 shtator /ATSH/ Krijimi i një biblioteke ambulante që do t’u mundësojë të paraburgosurve qasje të vazhdueshme në libra dhe literaturë të ndryshme, duke mbështetur procesin e edukimit dhe rehabilitimit të tyre, është në fokus të marrëveshjes që u nënshkruan sot midis, Drejtorisë së Burgjeve dhe Bashkisë Elbasan.
Drejtori i Përgjithshëm i Burgjeve, Klevis Qose, dhe kryetari i Bashkisë së Elbasanit, Gledian Llatja, në ambientet e Bibliotekës së Qytetit të Elbasanit “Qemal Baholli”, nënshkruan marrëveshjen e bashkëpunimit midis kësaj biblioteke dhe Institucionit të Paraburgimit Elbasan.
Në fjalën e tij, Llatja e vlerësoi këtë nismë si një hap të rëndësishëm drejt përmirësimit të jetës së të paraburgosurve.
“Libri ka fuqinë të ndryshojë jetë, dhe kjo bibliotekë ambulante është një mundësi për të ofruar edukim dhe shpresë për të gjithë ata që kërkojnë një të ardhme më të mirë”, tha ai.
Nga ana tjetër, Qose e cilësoi këtë nismë si një arritje të rëndësishme për sistemin e burgjeve.
“Kjo është një risi e madhe për institucionin tonë. Përmes librit, të paraburgosurit do të kenë mundësinë të zhvillohen intelektualisht dhe emocionalisht, duke i ndihmuar në procesin e rehabilitimit dhe integrimit në shoqëri”, u shpreh Qose.
Të dy palët shprehën dëshirën që kjo nismë të shtrihet edhe në institucione të tjera, duke u bërë model për bashkëpunim të mëtejshëm në të gjithë vendin.
