KINISHEV, 21 gusht /ATSH-DPA/ – Kancelari gjerman Olaf Scholz udhëtoi sot drejt Moldavisë, ish-republikën sovjetike në kufi me Ukrainën, që tashmë ndihet e kërcënuar nga pushtimi i Rusisë ndaj fqinjit të saj.
Scholz do të flasë me presidenten moldave Maia Sandu dhe kryeministrin Dorin Recean në kryeqytetin Kishinev.
Bisedimet e tij do të fokusohen kryesisht në ndikimin e luftës së Rusisë kundër Ukrainës në vendin e vogël me 2,6 milionë banorë.
Qeveria e Moldavisë, e cila po kërkon të anëtarësohet në Bashkimin Evropian, akuzon Rusinë për dezinformim dhe destabilizimin e qëllimshëm.
Ushtarët rusë janë stacionuar në rajonin e shkëputur të Transnistrisë, një rrip i ngushtë toke në lindje të republikës, që nga vitet 1990.
Scholz vizitoi Moldavinë vitin e kaluar për një samit evropian. Megjithatë, udhëtimi i tij aktual është vizita e parë dypalëshe nga një kancelar gjerman në 12 vjet.
Që nga viti 2018, Gjermania ka mbështetur Moldavinë me më shumë se 41 milionë euro për sektorin e sigurisë dhe, sipas qeverisë gjermane, është donatori i pestë më i madh në vend, një nga më të varfrit në Evropë./ /os/
