TIRANË, 9 korrik/ATSH/ Ministrja e Turizmit dhe Mjedisit, Mirela Kumbaro i bëri apel sot bashkive të aplikojnë gjobat për ndotësit e ambientit.
Duke publikuar pamje nga koshat e boshatisur dhe mbeturinat e hedhura në rrugë, Kumbaro tha se “është vetëm një nga shumë rastet me të cilat përballemi përditë në vijën bregdetare, ku qytetarë e biznese nuk e kanë kuptuar dëmin që i bëjnë mjedisit dhe turizmit, por vazhdojnë avazin e vjetër me plehrat që i hedhin ku t’u vijë për mbarë duke shëmtuar gjithçka”.
“S’duhet të ketë tolerancë. Të gjitha policitë bashkiake duhet të aplikojnë gjobat, siç është edhe ky rast nga Policia Bashkiake e Vlorës, sepse ndotja mjedisore është krim që dënohet”, tha Kumbaro.
Plani Kombëtar i Pastrimit rrënjësor të Shqipërisë nisi më 7 nëntor 2021 në Vlorë dhe vijon në të gjithë vendin.
Procesi i pastrimit në territor kryhet nga bashkitë, por nisur nga flukset e shtuara turistike prej tre vitesh tashmë Ministria e Turizmit dhe Mjedisit ka vendosur të mbështesë njësitë vendore gjatë muajve të fluksit.
/k.s/r.e/
