TIRANË, 8 korrik /ATSH/ Kreu i Demokratëve Euroatlantikë, Lulzim Basha, ka reaguar në lidhje me propozimin e PS për zgjedhoren.
Në një postim në Facebook, Basha shkruan se dështimi i Reformës Zgjedhore, kishte pikërisht këtë qëllim, që shqiptarët të mos zgjidhnin me votën e tyre deputetët në parlament dhe që të pamundësohet vota e shqiptarëve që jetojnë jashtë vendit.
Basha sjell në vëmendje propozimet e Demokratëve Euroatlantikë për lista të hapura, Shqipëria një zonë zgjedhore dhe garantimi i votës së diasporës, të cilat ndodhen prej muajsh në sirtarët e Kuvendit.
Ndërsa më tej, ai thotë se, shqiptarët do të kenë mundësi të shohin në Kuvendin e Shqipërisë se kush është për lista te hapura dhe kush jo, kush është pjesë e pazarit me Edi Ramën ne kurriz të shqiptarëve dhe kush mbron interesin e tyre.
“Sabotimi i listave të hapura dhe i votës së diasporës është kurorëzimi i një plani anti-demokratik kundër interesave të qytetarëve shqiptarë”, u shpreh Basha.
“Sot në Kuvendin e Shqipërisë janë dy nisma, ajo për lista të hapura, Shqipëria një zonë zgjedhore dhe garantimi i votës së diasporës, të propozuar prej nesh, Demokratëve Euroatlantikë, dhe propozimi i socialistëve që sërish i mban listat e mbyllura dhe u pamundëson shqiptarëve jashtë vendit të votojnë”, nënvizoi Basha.
“Shqiptarët do të kenë mundësi tashmë të shohin në Kuvendin e Shqipërisë se kush është për lista të hapura dhe kush jo, kush është pjesë e pazarit me Edi Ramën në kurriz të shqiptarëve dhe kush mbron interesin e tyre”, shtoi më tej kreu i demokratëve euroatlantikë.
Basha u shpreh se, frika nga vota e lirë, frika nga humbja e pushtetit, frika nga fundi i pandëshkueshmërisë, nuk mund të mbajnë peng vullnetin e shumicës së qytetarëve shqiptarë që kërkojnë ndryshim të vërtetë.
“Qytetarët shqiptarët meritojnë një Reformë Zgjedhore të vërtetë”, theksoi Basha.
