VJENË, 4 prill /ATSH-DPA/- Ministrja austriake e Drejtësisë Alma Zadic kërkon të forcojë ligjin penal të vendit në përgjigje të një skandali të dyshuar spiunazhi që përfshin Rusinë.
“Aktualisht, vetëm aktivitetet e agjentëve që janë në dëm të Austrisë janë të dënueshme, por në të ardhmen të gjitha aktivitetet e agjentëve duhet të ndalohen, pavarësisht se kundër kujt janë të drejtuara”, tha Zadic për transmetuesin ORF dhe agjencinë e lajmeve APA.
“Lajmet aktuale na bëjnë të kuptojmë se është e nevojshme të mbyllen këto boshllëqe në ligjin penal”, tha ajo.
Nisma u nxit nga hetimet ndaj një ish-zyrtari austriak nga Zyra për Mbrojtjen e Kushtetutës, i cili dyshohet se kishte akses në bazat e të dhënave të qeverisë në emër të Rusisë. Ish-zyrtari u arrestua javën e kaluar dhe ndodhet në paraburgim.
Forcimi i planifikuar i ligjit lidhet gjithashtu në një kuptim më të gjerë me lidhjen e dyshuar midis të dyshuarit dhe ish-anëtarit të bordit të Wirecard, Jan Marsalek.
Gazeta e përjavshme “Falter” publikoi dje në mbrëmje urdhrin e arrestit për zyrtarin.
Sipas dokumentit nga zyra e prokurorit publik, ai dyshohet se kishte mbledhur fakte dhe informacione sekrete që nuk ishin të destinuara për publikun, si dhe të dhëna personale nga bazat e të dhënave të policisë me qëllim transmetimin e tyre te Jan Marsalek dhe përfaqësuesve të panjohur të autoriteteve ruse.
Sipas hetuesve gjyqësorë, zyrtari kishte spiunuar kundërshtarët e mërguar të regjimit rus në emër të Moskës. //a.i/
