TIRANË, 6 shkurt/ATSH/ Ministria e Drejtësisë do të organizojë nga data 15 shkurt deri në 22 shkurt 2024, Javën e Mbrojtjes së Viktimave të Krimit në Shqipëri.
Ministri i Drejtësisë Ulsi Manja, përmes një videomesazhi në rrjetet sociale, tha se kjo javë ndërgjegjësimi do të realizohet çdo vit.
“Qeveria shqiptare ka miratuar të parën strategji Ndërsektoriale për Mbrojtjen e Viktimave të Krimit. Kjo strategji, siguron një kuadër garantues për mbrojtjen e viktimave. Nga data 15 shkurt deri më 22 shkurt 2024, Ministria e Drejtësisë Organizon javën e Mbrojtjes së Viktimave në Shqipëri”, thekson Manja.
“Kjo nismë do të jetë e përvitshme! Ftojmë të gjithë aktorët, përfaqësues të institucioneve qendrore, vendore, shoqërinë civile, mediet dhe komunitetin të bashkohen me ne në këtë fushatë ndërgjegjësimi. Mbrojtja e viktimave të krimit është një detyrë qytetare për një shoqëri të sigurt”, përfundon Manja.
/r.e/
