TIRANË, 8 janar/ATSH/ Ministrja e Kulturës, Elva Margariti, publikoi statistikat e mbledhura gjatë vitit që lamë pas sa i takon vizitueshmërisë së institucioneve dhe monumenteve të kulturës.
“Gjatë vitit 2023 numri i vizitorëve në institucionet e trashëgimisë kulturore dhe monumente e ka tejkaluar edhe rekordin e vitit 2019”, shkruan ministrja Margariti, duke uruar që 2024 të jetë një vit edhe më i mire.
Viti 2023 pati 46% më shumë vizitorë se viti 2022.
Sipas të dhënave të Ministrisë së Kulturës, gjatë vitit 2023 pati më shumë se 1 milion vizitorë vendas e të huaj në institucionet dhe qendrat e trashëgimisë kulturore. Për të njëjtën periudhë, nga janari në dhjetor, një vit më parë, vizitorët ishin rreth 689000, ndërsa 2 vite më parë, në 2021 sitet e trashëgimisë kulturore u vizituan nga 425565 vizitorë.
