TIRANË, 13 dhjetor /ATSH/ Kryeministri Edi Rama ndodhet sot në Bruksel, ku po merr pjesë në Samitin e Bashkimit Evropian dhe Ballkanit Perëndimor, i cili zhvillohet një vit pas Samitit të mbajtur më 6 dhjetor në Tiranë, me pjesëmarrjen e liderëve të BE dhe të Ballkanit Perëndimor.
Kryeministri Rama ndau disa pamje përpara samitit, teksa u shpreh krenar për Shqipërinë.
Përpara Samitit, Këshilli Evropian publikoi konkluzionet e tij, ku përgëzon tij bashkëpunimin me Shqipërinë, ndërkohë që kërkon hapjen sa më shpejt të grupit të parë negociues me Shqipërinë.
Në Konkluzionet e Këshillit për Zgjerimin, të miratuara nga Këshilli më 12 dhjetor për Malin e Zi, Serbinë, Maqedoninë e Veriut, Shqipërinë, Bosnjë-Hercegovinën, Kosovën, Turqinë, Ukrainën, Moldavinë dhe Gjeorgjinë, përshëndetet bashkëpunimi me Tiranën në procesin integrues.
Këshilli përshëndet konferencën e parë ndërqeveritare të mbajtur me Shqipërinë në korrik 2022.
Ai përshëndet progresin e reformave të bërë në vitin e kaluar, duke përfshirë përfundimin me sukses të takimeve të procesit të screening. Këshilli pret me padurim të ndërmarrë hapat e ardhshëm në procesin e anëtarësimit të Shqipërisë dhe hapjen e grupit të parë negociues sa më shpejt të jetë e mundur.
Samiti i fundit mes liderëve të BE-së dhe Ballkanit Perëndimor u zhvillua në Tiranë në 6 dhjetor 2022. Ky ishte samiti i parë mes liderëve të BE-së dhe Ballkanit Perëndimor që është zhvilluar në rajonin e Ballkanit Perëndimor.
/r.e/
