TIRANË, 13 dhjetor /ATSH/ Komisioneri për Zgjerim, Oliver Varhelyi zhvilloi një takim me Kryeministrin Edi Rama në kuadër të samitit BE-Ballkani Perëndimor në Bruksel, ku u diskutuan hapat e ardhshëm të Shqipërisë në rrugën e saj në BE.
Përmes një mesazhi në rrjetin social X, Varhelyi shkroi se, “në margjinat e Samitit BE-Ballkani Perëndimor u diskutuan hapat e ardhshëm të Shqipërisë në rrugën e saj në BE me Kryeministrin Edi Rama. Ndërsa përfunduam shqyrtimin e screening, ne jemi gati të hapim negociatat e anëtarësimit për grup-kapitullin 1 të çështjeve themelore në kuadrin e një Konference Ndërqeveritare ende këtë vit”.
Kryeministri Edi Rama ndodhet sot në Bruksel, ku po merr pjesë në samitin e Bashkimit Europian dhe Ballkanit Perëndimor, i cili zhvillohet një vit pas samitit të mbajtur më 6 dhjetor në Tiranë, me pjesëmarrjen e liderëve të BE dhe të Ballkanit Perëndimor.
/r.e/
