TIRANË, 11 dhjetor /ATSH/ Presidenti i Federatës Shqiptare të Futbollit, Armand Duka zhvilloi një vizitë në Pukë, me ftesë të kryetarit të bashkisë Pukë, Rrok Dodaj dhe klubit “Tërbuni”.
Duka ishte i shoqëruar edhe nga presidenti i “Teutës”, Edmond Hasanbelliu.
Në këtë vizitë u diskutua për projekte e bashkëpunime të rëndësishme.
“Falënderoj kryebashkiakun Dodaj, drejtorin sportiv të Tërbunit, Alfred Pjetri, për vëmendjen dhe kontributin e tyre në zhvillimin e futbollit në këtë zonë”, u shpreh Duka në një postim në rrjetet sociale.
Duka theksoi se u ra dakord për bashkëpunimin për ndërtimin e një parku sportiv për fëmijët dhe ekipet në Pukë.
“Ramë dakord që FSHF dhe Bashkia Pukë të bashkëpunojnë për ndërtimin e një parku sportiv për fëmijët dhe ekipet që mund ta shfrytëzojnë për fazë përgatitore, duke parë klimën e përshtatshme që ka kjo zonë edhe gjatë verës”, theksoi Duka.
/r.e/
