TIRANË, 8 tetor/ATSH/ Pas bisedës me të rinjtë, kryetari i Partisë Demokratike, Lulzim Basha, gjatë paradites takoi e bisedoi me qytetarë e sipërmarrës të qytetit të Fierit.
Qytetarët i thanë Bashës se papunësia është një problem i madh edhe në Fier.
Në një postim në rrjetet sociale Basha shkruan se “përkeqësimi i situatës ekonomike ka rritur emigracionin në Fier ashtu si në të gjithë vendin. Shqetësimet e qytetarëve lidhen me çmimet e larta të ushqimeve, tarifave, naftës, gazit, energjisë. 1 në 3 familje nuk kanë mundësi të përdorin naftën, gazin apo energjinë elektrike për transport, ndriçim apo ngrohje gjatë dimrit duke e bërë edhe më të vështirë situatën për mijëra familje”.
“Shqipëria më e varfra në rajon, renditet ndër vendet më të korruptuara të botës. Vetëm afera e inceneratorëve, viktimë e së cilës është dhe Fieri, iu kushton shqiptarëve 430 milionë euro. Para të cilat vidhen, ndërkohë që qytetet tona mbulohen nga smogu, mbushen me plehra, sepse e gjitha është veçse një skemë mashtrimi, vjedhje dhe shfrytëzimi”, theksoi Basha.
Prandaj, shtoi Basha, lufta kundër korrupsionit është për Partinë Demokratike prioriteti kryesore.
“Ne mbështesim dhe inkurajojmë SPAK-un ti shkojë deri në fund ndëshkimit të zyrtarëve dhe ish-zyrtarëve të korruptuar që po varfërojnë dhe zbrazin Shqipërinë”, tha Basha.
/k.s/
