TIRANË, 29 shtator /ATSH/ Kryetarja e Komisionit për Çështjet Ligjore, Administratën Publike dhe të Drejtat e Njeriut, Klotilda Bushka zhvilloi një takim pune me dy bashkëraportuesit për Shqipërinë, Asim Mollazada dhe Ionut Stro nga Asambleja Parlamentare e Këshillit të Europës, si edhe zëvendësshefin e sekretariatit të Komitetit të Monitorimit të Asamblesë, Bas Klein.
Bushka nënvizoi se, në fokus të diskutimeve ishin rezultatet e reformës në drejtësi dhe u ritheksua rëndësia e avancimit të saj, veçanërisht për rritjen e eficiencës së sistemit gjyqësor.
Asim Mollazada (Azerbajxhan, KE/DA) dhe Ionut Stroe (Rumani, EPP/CD), bashkëraportues të Asamblesë Parlamentare të Këshillit të Evropës (APKE) për monitorimin e detyrimeve dhe angazhimeve nga Shqipëria, zhvilluan një vizitë faktmbledhëse në vend.
Diskutimet u fokusuan kryesisht në zhvillimet e fundit politike, reformën në drejtësi, luftën kundër korrupsionit, demokracinë lokale dhe decentralizimin, situatën e minoriteteve dhe lirinë e medias.
/r.e/
