TIRANË, 19 korrik/ATSH/ Festivali Ndërkombëtar i Animacionit “Anibar” hapi dyert për herë të 14-të në Pejë.
Ministria e Punëve të Jashtme dhe Diasporës, në kuadër të platformës për diasporën “Shijo Kosovën”, ka mbështetur edicionin e 14-të të Festivalit të Animacionit Anibar, i cili do të mbahet deri më 23 korrik 2023. Ky festival është një platformë e jashtëzakonshme që bashkon animatorë, artistë dhe entuziastë nga e gjithë bota.
Me çdo film nën 30 minuta, ky konkurs sjell një eksplorim të fuqishëm dhe të kondensuar temash dhe shprehjesh artistike.
Rëndësia e Konkursit Ndërkombëtar qëndron në të qenit një vitrinë globale. Duke përfaqësuar një mori këndvështrimesh, konkursi këtë vit bashkon kineastët nga Franca, Kina, Estonia, Belgjika, Hungaria, Italia, Holanda, Zelanda e Re, Polonia, Portugalia, Federata Ruse, Afrika e Jugut, Spanja dhe Australia.
Gjatë gjithë edicionit njëjavor të Festivalit Anibar, pritet të zhvillohen mbi 130 shfaqje filmash, 4 panele diskutimi, 5 punëtori të animacionit të udhëhequra nga ekspertë, si dhe 5 prezantime të shfaqjeve ikonike si South Park. Po ashtu, do të ketë programe të shumta speciale dhe netë muzikore.
Në hapjen e festivalit ishin të pranishëm zëvendëskryeministrja e Kosovës, Donika Gërvalla, kryetari i komunës së Pejës Gazmend Muhaxheri, ambasadorë dhe përfaqësues të tjerë të institucioneve dhe shoqërisë civile, artistë dhe dashamirës të artit.
/r.e/
