TIRANË, 12 maj/ATSH/ Kandidati i PD-së për kryetar bashkie në Tiranë, Roland Bejko ka reaguar sot lidhur me dëmtimin e reklamave të PD-së, sipas tij, nga nga simpatizantë të kryetarit të Komisionit të Rithemelimit të PD-së, Sali Berisha.
Ata kanë fshirë numrin edhe emrin e Bejkos dhe me bojë të zezë kanë shkruar emrin e Belind Këlliçit.
Në një reagim në rrjetet sociale, Bejko thekson se “kjo është prova se Sali Berisha në këto zgjedhje nuk ka garë me socialistët, por me Partinë Demokratike. Berisha dhe Metaj kanë frikë nga forca e demokratëve të thjeshtë që do të votojnë masivish kundër tyre dhe Edi Ramës në 14 maj”.
“E dënoj me forcë këtë akt vandal, por gjithashtu i bëj thirrje autoriteteve që të marrin masat dhe të venë para përgjegjësisë shkelësit e ligjit”, u shpreh Bejko.
/r.e/
