PRISHTINË, 12 prill /ATSH/ Presidenti i Serbisë, Aleksander Vuçiç, ka pritur në takim ambasadorin amerikan në Beograd, Christopher Hill, të cilit i është ankuar për situatën në veri të Kosovës.
Sipas tij, qytetarët serb në Kosovë po përballen me sfida të vështira.
“E njoftova ambasadorin Hill me situatën dhe sfidat gjithnjë e më të vështira me të cilat përballet populli ynë në Kosovë dhe përsërita shqetësimin tim për sulmet e shpeshta, arrestimet dhe presionet e tjera ndaj të cilave janë të ekspozuar serbët”, ka shkruar Vuçiç në profilin e tij në Instagram.
Sipas Vuçiç, Serbia po përpiqet të sigurojë një jetë më të lehtë për të gjithë qytetarët, me respektimin dhe zbatimin e të drejtës ndërkombëtare dhe asaj që është dakorduar në dialogun e Brukselit.
Lidhur me këtë ai ka thënë se ka kërkuar nga ambasadori Hill mbështetjen dhe angazhimin e plotë të Shteteve të Bashkuara të Amerikës./KosovaPress/
