TIRANË, 11 shkurt/ATSH/ Në bashkinë e Lushnjës ka nisur puna për asfaltimin e rrugës së SMT-së në Kolonjë, investim që zgjidh një shqetësim disavjeçar për banorët e kësaj zone.
Drejtuesi politik i Partisë Socialiste për qarkun e Fierit, Taulant Balla dhe kryetarja e bashkisë Lushnjë, Eriselda Sefa inspektuan sot nga afër punimet që po kryhen në këtë njësi administrative.
Sefa informoi se aktualisht janë hedhur shtresat e para në bazamentin e rrugës dhe tashmë ajo është gati për asfaltim.
Ajo theksoi se paralel me ndërtimin e rrugës do të bëhet edhe ndërtimi i një ure lidhëse si dhe pastrimi i përroit të zonës.
Nga ana tjetër, Balla vlerësoi vendimin e bashkisë Lushnjë për të kaluar pastrimin në një ndërmarrje publike.
“Ky është vendim i vështirë për ditët e para, por historik, pasi është e vetmja mundësi që ne t’i ofrojmë shërbim pastrimi çdo fshati, çdo lagjeje, edhe të njësisë tuaj dhe gjithë zonës”, tha ai.
Ndërkohë, Balla bëri thirrje për ndërtimin e një pike të veçantë për përpunimin e mbetjeve të gjelbra dhe kthimin e tyre në pleh organik./m.m/
