TIRANË, 1 shkurt/ATSH/ Në qytetin e Shkodrës është realizuar loja edukative ArchiGames, një projekt dedikuar fëmijëve për njohjen e arkitekturës dhe vlerave të trashëgimisë kulturore të qytetit të tyre.
Me mbështetjen e ministrit të Shtetit për Mbrojtjen e Sipërmarrjes, “ArchiGames” po zbaton projektin edukativ nëpërmjet lojës.
Loja e radhës u zhvillua në Muzeun Kombëtar të Fotografisë “Marubi”. Të luash, të mësosh, por dhe të angazhohesh, ky ka qenë qëllimi kryesor i projektit që është sjellë me shumë kujdes drejt finales nga arkitektja e re Xhoana Kristo dhe “ArchiGames”.
Në ditën e promovimit të “ArchiGames – Mëso Arkitekturën duke Luajtur për qytetin e Shkodrës”, Ester është shpallur si kryearkitekte e Shkodrës. Ajo është nxënëse e shkollës 9-vjeçare “Branko Kadia” dhe njëkohësisht, fituese e lojës në konkursin mes shkollave 9-vjeçare të qytetit.
Projekti nisi shtatorin e kaluar duke realizuar punën kërkimore në terren me ndihmën e profesionistëve. Produkti i këtij startup-i janë edicionet e lojës “Mëso arkitekturën duke luajtur” Shkodra dhe Tirana.
Ministria e Shtetit për Mbrojtjen e Sipërmarrjes është mbështetësi financiar i ArchiGames.
