TIRANË, 1 dhjetor/ATSH-Maela Marini/ Kryeministri Edi Rama deklaroi sot se “Ballkani i hapur” është një nismë në përputhje të plotë, 100%, me frymën dhe germën e BE-së, dhe nga ana tjetër është pjellë e Procesit të Berlinit”.
Në një prononcim për medie pas mbledhjes së qeverisë, Kryeministri Edi Rama iu përgjigj interesit të gazetarëve mbi “Ballkanin e hapur”.
“Mjafton të marrim në konsideratë faktin që në Procesin e Berlinit të ristartuar kemi firmosur ekzaktësisht ato dokumente që ishin më parë firmosur në Ballkanin e Hapur. Kështu që, ne nuk kemi asnjë arsye të ndryshojmë opinion mbi Ballkanin e Hapur. Mbase ata, që janë kundër Ballkanit të Hapur, kanë arsye të ndryshojnë opinionin, por është e drejta e tyre të kenë një opinion të ndryshëm nga ky i yni”, tha ai.
Kryeministri tha po ashtu se “Ballkani i hapur” ka marrë miratimin e më shumë se 60% të shqiptarëve, të qytetarëve shqiptarë të konsultuar gjatë Këshillimit Kombëtar.
/r.e/
