TIRANË, 1 korrik/ATSH/ Punonjësit e Administratës së Zonave të Mbrojtura Shkodër kanë arritur të vënë nën kontroll flakët e një vatre zjarri në malin e Kolajve, në Velipojë.
E kontaktuar nga ATSH, AdZM Shkodër raportoi se flakët janë vënë nën kontroll në Velipojë dhe se zjarri është drejt shuarjes së plotë.
“Punonjësit e AdZM Shkodër, gjenden aty për të vijuar monitorimin, në rast aktivizimi të ndonjë vatre. Deri më tani janë përshkuar nga zjarri, rreth 2 hektarë tokë, me shkurre e barishte”, pohon për ATSH AdZM Shkodër.
Ndërsa temperaturat rriten në vlera ekstreme, të paktën për muajin që lamë pas, ndikimi i parë i tyre shihet në rënien e zjarreve në pyje dhe kullota.
Autoritetet lokale kanë kërkuar bashkëpunimin e banorëve të “Zonave të Mbrojtura” si grupi i parë kyç, në parandalimin dhe ndërhyrjen në raste zjarresh.
Punonjësit e AdZM Shkodër luftuan për orë të tëra me flakët dhe pasi arritën të fitonin ndaj flakëve u kujtuan edhe një herë banorëve të zonës se çdo zjarrvënie është vepër penale dhe do të punohet për vënien para përgjegjësisë të çdo piromani.
Gjithashtu, u bënë thirrje banorëve, bizneseve e vizitorëve të tregojnë kujdes maksimal gjatë aktiviteteve të tyre në zonat e mbrojtura.
/r.e/
