TIRANË, 28 qershor /ATSH/ Ministrja e Turizmit dhe Mjedisit, Mirela Kumbaro mori pjesë sot në Ministerialin e mbajtur në Tiranë ku ishte e pranishme edhe Mariya Gabriel, Komisionerja Evropiane për Inovacionin, Kërkimin, Kulturën, Edukimin dhe të Rinjtë.
Në këtë Ministerial u prezantua raporti për gjendjen e Mjedisit dhe Klimës në Ballkanin Perëndimor.
Kumbaro u shpreh se ky raport është një mundësi për të reflektuar mbi hapat konkretë që po ndërmarrim në mbrojtje të natyrës.
“Nga Plani i Pastrimit Kombëtar, te ndalimi i qeseve plastike njëpërdorimshe dhe rritja e sipërfaqes së zonave të mbrojtura, janë vendime të pak muajve, të cilat na e bëjnë më të sigurt përditshmërinë”, shkroi Kumbaro në një postim në rrjetet sociale
“Ama”, theksoi Kumbaro, “që të ndryshojmë një herë e mirë sjelljen tonë kemi nevojë për ndryshimin e mendësisë karshi mjedisit, për angazhimin e të rinjve, për edukimin e tyre”.
Kumbaro u shpreh se, “shpejt nisim programin e edukimit mjedisor në shkolla e për këtë kemi mbështetjen e partnerëve evropianë”.
/j.p/r.e/
