PARIS, 28 qershor /ATSH-ANSA/- Lufta e Putinit kundër Ukrainës është një dështim i kujtesës sonë. Ne jemi rritur në një Evropë të lirë dhe kemi harruar se ka individë në kufijtë tanë që mendojnë se nuk duhet të ketë demokraci, deklaroi sot presidentja e Parlamentit Evropian, Roberta Metsola në konferencën vjetore të “Jacques Delors” të organizuar këtë vit në Kinematekën e Parisit.
E sponsorizuar nga Jacques Delors Institut Notre-Europe e kryesuar nga Enrico Letta, Konferenca “Jacques Delors” është ngjarja më e rëndësishme e Académie Notre Europe. Objektivi i konferencës është i dyfishtë; të krijojë një dialog mes personaliteteve evropiane dhe të rinjve, në mënyrë që këta të fundit të shprehin pritshmëritë dhe aspiratat e tyre në lidhje me projektin evropian, edhe në kuadër të luftës aktuale në Ukrainë.
Qëllimi tjetër është t’u mundësojë të rinjve të kuptojnë më mirë funksionimin e Bashkimit Evropian dhe politikat e tij dhe mundësitë që ai ofron. Këtë vit, konferenca sillet rreth temës së ‘premtimit’ për një Evropë më gjithëpërfshirëse dhe mbështetëse.//a.i/
