TIRANË, 20 qershor/ATSH/ Shqipëria dhe Kosova nënshkruan sot dy marrëveshje bashkëpunimi në fushën e energjisë, që i kontribuojnë sigurisë së furnizimit, por edhe diversifikimit të burimeve energjetike.
Marrëveshjet u nënshkruan nga ministrja e Infrastrukturës dhe Energjisë së Shqipërisë, Belinda Balluku dhe ministrja e Ekonomisë së Republikës së Kosovës, Artane Rizvanolli.
Përmes një memorandumi dy kompanitë, KESH dhe KEK do të kryejnë depozitimin dhe shkëmbimin e energjisë elektrike.
Duke sjellë në vëmendje efektet e krizës në tregun energjetik botëror, Balluku vuri theksin në rëndësinë e bashkëpunimit mes KESH dhe KEK përmes depozitimit dhe shkëmbimit energjetik.
“Mungesa e sasisë energjetike është ajo që na tremb më shumë dhe bashkëpunimi mes dy kompanive KESH dhe KEK, i cili nisi që dimrin e kaluar, ka dhënë rezultate”, deklaroi Balluku.
Lidhur me memorandumin e bashkëpunimit mes dy ministrive për zhvillimin e terminalit LNG në Vlorë, Balluku tha se i hap rrugën marrëveshjes që i siguron Republikës së Kosovës krijimin e kapaciteteve të energjisë elektrike, për një periudhë afatgjatë, duke bërë të mundur edhe nga ana e palës shqiptare të kryejë planifikimin edhe për nevojat e Kosovës për furnizimin me gaz.
Ndërsa ministrja e Ekonomisë së Kosovës, Artane Rezvanolli tha se marrëveshjet i kontribuojnë sigurisë së furnizimit, por edhe diversifikimit të burimeve energjetike.
/j.p/r.e/
