TIRANË, 31 maj /ATSH/ Erkand Qerimaj shpallet kampion Evrope në shkëputje, në Kampionatin Evropian të Peshëngritjes që po zhvillohet në Tiranë.
Kryeministri Edi Rama ka publikuar pamje në rrjetet sociale nga momenti i shpalljes kampion të peshëngritësit shkodran, Erkand Qerimaj.
“Në ditën katërt një tjetër sukses u regjistrua në radhët e peshëngritësve shqiptarë, Erkand Qerimaj u shpall kampion Evrope në shkëputje”, shkruan Rama.
Kryetari i bashkisë së Tiranës, Erion Veliaj përmes një postimi shprehet krenar për fitoren e Erkand Qerimaj.
“Erkand Qerimaj, kampion Evrope.Lajmi i dytë i mirë nga Kampionati Evropian i Peshëngritjes, që po zhvillohet te Parku Olimpik i Tiranës. Krenar”, shkruan Veliaj.
Qerimaj ngriti në baterinë B 150 kg, më shumë se kushdo tjetër. Medalja argjendi shkoi për Asanidze që ngriti po 150 kg, ndërsa në vendin e tretë u rendit turku Ozbek me 149 kg.
