TIRANË, 19 shkurt/ATSH/ Ndërtimi i bajpasit të Vlorës, i cili pritet të lehtësojë ndjeshëm trafikun dhe shkurton kohën e udhëtimit për në jug të Shqipërisë, po ecën me ritme të shpejta.
Autoriteti Rrugor Shqiptar bëri të ditur sot se punimet deri tani janë realizuar në masën 80%.
Sipas ARRSH-së, po punohet me realizimin e shtresës së dytë asfaltike (binder 6cm), deri tani kanë përfunduar rreth 8 km.
Po ashtu, po punohet në zonën e Kaninës me formimin e trupit të rrugës dhe mbrojtjen e skarpatave.
“Përfundimi i plotë i kësaj vepre të rëndësishme lehtëson trafikun, nxjerr në pah pamjen e qytetit të Vlorës dhe shkurton kohën e udhëtimit për në jug të Shqipërisë”, bën të ditur ARRSH.
