TIRANË, 1 shkurt /ATSH/ Për shkak të motit të keq me reshje shiu dhe dëbore, në disa akse dhe segmente rrugore është krijuar vështirësi në qarkullimin e automjeteve.
Policia e Shtetit bëri të ditur sot se, kryesisht në bajpasin e Rrugës së Arbrit dhe në Qafë Murrizë është vështirësuar qarkullimi i automjeteve, dhe si pasojë në këtë aks nuk lejohet qarkullimi deri në pastrimin e saj nga borëpastrueset.
Ndërsa në Qafën e Thanës, zona e Librazhdit dhe në Rrugën e Kombit, aktualisht kalohet pa zinxhirë, pasi po punohet me borëpastruese për të mbajtur pastër këto akse rrugore.
Policia shtoi se, në disa akse rrugore rurale, në Korçë, Shkodër, Dibër e Kukës, kalimi bëhet me zinxhirë.
Me qëllim parandalimin e aksidenteve rrugore, si dhe për t’u ardhur në ndihmë përdoruesve të rrugës, në rast nevoje, për shkak të motit të keq, Policia e Shtetit ka marrë një sërë masash emergjente, duke rritur prezencën e shërbimeve me uniformë, në të gjitha rrugët e vendit.
Policia e Shtetit apeloi për të gjithë drejtuesit e mjeteve që të rrisin kujdesin në rrugë gjatë kalimit në të gjitha akset rrugore, pasi ka prezencë të ujit dhe të dëborës, të vendosin rripin e sigurimit dhe mos përdorin celularin gjatë drejtimit të mjetit, të mos qarkullojnë me shpejtësi, të mos kryejnë parakalime dhe të mos drejtojnë mjetin nën ndikimin e alkoolit, apo më keq akoma, në gjendje të dehur.
/j.p/r.e/
