TIRANË, 24 dhjetor /ATSH/ Qeveria mbështet punësimin e sapodiplomuarve, duke nxitur bashkëpunimin mes biznesit dhe universiteteve.
Në draft programin ekonomik afatmesëm vend të rëndësishëm zënë skemat e mbështetjes që synojnë forcimin e bashkëpunimit mes bizneseve inovative dhe akademisë me fokus zhvillimin e kapitalit njerëzor bashkëpunues.
Sipas këtij programi, qeveria do të japë asistencë për ndërmarrjet e vogla dhe të mesme që punësojnë të rinjtë e talentuar në projekte inovacioni.
Të diplomuarit e rinj do të punësohen për detyra në fushat e kërkimit dhe zhvillimit, zhvillimit/përmirësimit të produkteve dhe proceseve të reja, kërkimit të tregut dhe zhvillimit të biznesit për inovacion.
Kjo skemë do të sigurojë një subvencion pagash që mbulon deri në 50% të pagës bruto, si dhe shpenzimet e lidhura me punën (si trajnimi) të një të sapodiplomuari nga një SME për të punuar në projekte inovacioni, për një periudhë deri në 18 muaj.
Ndërsa skema asistencë për studentët e doktoraturës, parashikon subvencion kompanisë për pagën e këtij kandidati deri në 3 vjet. /a.a/
