BERLIN, 19 dhjetor /ATSH-DPA/ – Ministrja e re gjermane e Mbrojtjes Christine Lambrecht ka planifikuar të vizitojë sot ushtarët e Budeswehr të dislokuar në Lituani.
Politikania socialdemokrate dëshiron të marrë një pasqyrë të misionit të NATO-s në vendin baltik dhe të takojë ushtarët e Bundeswehr-it përpara Krishtlindjeve.
Gjermania siguron rreth gjysmën e 1200 ushtarëve të njësisë luftarake shumëkombëshe të NATO-s në Lituani dhe e udhëheq atë si i ashtuquajturi kombi kornizë.
Në përgjigje të aneksimit të gadishullit ukrainas të Krimesë prej Rusisë në vitin 2014, aleanca e mbrojtjes perëndimore kishte forcuar mbrojtjen e krahut të saj lindor.
Njësitë e përbashkëta luftarake u vendosën në tre shtetet baltike dhe Poloni si pjesë e pranisë së shtuar.
Ato shkëmbehen çdo gjashtë muaj, pjesërisht sepse Akti Themelues NATO-Rusi nuk lejon vendosjen e përhershme të trupave aleate në Evropën Lindore.
Lambrecht u emërua ministre e Mbrojtjes këtë muaj si pjesë e qeverisë së re të Gjermanisë nën drejtimin e kancelarit Olaf Scholz. //a.i/
