BERLIN, 18 nëntor /ATSH-DPA/- Kompania amerikane e teknologjisë, Google njoftoi sot se ka nënshkruar kontratat e para me botuesit gjermanë pas prezantimit të një ligji të ri që u jep më shumë të drejta botuesve të lajmeve në internet.
Marrëveshjet u nënshkruan, ndër të tjera, me revistën e përjavshme gjermane të lajmeve ‘Der Spiegel’, me të përjavshmen kombëtare ‘Die Zeit’; gazetën e përditshme gjermane ‘Tagesspiegel’ dhe kompaninë gjermane të reklamave online ‘Ströer’.
Kompanitë konfirmuan marrëveshjet me gjigantin e internetit, Google.
“Bisedat me një numër botuesish të tjerë janë në një fazë të avancuar”, deklaroi Google në një deklaratë.
“Si për ne dhe për partnerët tanë, këto marrëveshje për të drejtën e autorit përfaqësojnë një moment historik në forcimin e partneriteteve të suksesshme,” shtoi Google.
Në fillim të këtij viti, ligji gjerman për të drejtat e autorit u ndryshua duke marrë parasysh rëndësinë në rritje të internetit në lidhje me të drejtën e autorit. Kjo pason Direktivën Evropiane për të Drejtën e Autorit, e cila është zbatuar në shtetet anëtare të BE-së.
Gjermania ka miratuar gjithashtu një ligj të ri ndihmës për të drejtën e autorit për botuesit e shtypit dhe gazetarët në vend. //a.i/
