TIRANË, 6 gusht/ATSH/ Si pasojë e temperaturave të larta, gjatë 10 ditëve të fundit vendi ynë është përballur me situata problematike zjarri, të cilat kanë rrezikuar jetë njerëzish, banesa, gjënë e gjallë, trashëgimi kulturore, zona pyjore dhe parqe arkeologjike.
Kryeministri Edi Rama thekson se “në të gjithë territorin deri tani janë shuar 163 zjarre, për të cilat janë angazhuar 1289 Forca të Armatosura me 146 mjete të FA, 143 mjete zjarrfikëse, 1052 forca zjarrfikëse dhe 441 forca të tjera nga emergjencat civile”.
Në informacionin e përditësuar nga Ministria e Mbrojtjes sa i përket situatës së zjarreve, gjatës ditës së sotme, Rama bën të ditur se në Vlorë, në Gadishullin e Karaburunit, situata e zjarrit nuk paraqet rrezik për Parkun Kombëtar të Llogorasë. Vatra po mbahet nën kontroll.
Në Kukës, në majën e Runës gjithashtu flakët po mbahen nën kontroll nga ajri dhe toka. Flakët janë në drejtim të fshatit Shemri, por pa rrezik, pasi është në distancë të largët.
Në Mirditë, dy vatra zjarri ndodhen përkatësisht në fshatin Thirrë dhe Munellë. Situata aktualisht është nën kontroll dhe nuk paraqet rrezik.
Në Vermosh, në Malësinë e Madhe zjarri po mbahet nën kontroll dhe nuk paraqet rrezikshmëri.
Në Tropojë është bërë i mundur izolimi i flakëve në Betosh dhe Shëngjergj.
Në Shkodër, një tjetër vatër në Theth është izoluar dhe po monitorohet. Nuk paraqet rrezik. Zjarri në fshatin Cukal është drejt shuarjes përfundimtare.
Në Luginën e Valbonës, zjarri në Margegaj është në zonë shkëmbore dhe nuk paraqet rrezikshmëri.
/r.e/
