UASHINGTON, 26 korrik /ATSH-ANSA/ – Virologu Anthony Fauci, kreu i Institutit Kombëtar të Sëmundjeve Infektive të SHBA-së dhe këshilltari i presidentit Joe Biden, po promovon financimin e një programi për zhvillimin e prototipeve të vaksinave.
“Ato do të na mbrojnë nga të paktën 20 familje virusesh dhe nga rreziku i një pandemie të re”, tha ai, i cituar nga “New York Times”.
Fauci ka parashikuar të ketë një ekip super të specializuar shkencëtarësh dhe ekspertësh për të punuar në program.
Megjithatë, ambiciet e tij po përplasen me kosto të larta, që vlerësohen në rreth disa miliardë dollarë në vit, duke marrë parasysh që do të duhen të paktën pesë vjet për rezultatet e para./ /ervo/
