BRATISLAVË, 16 korrik /ATSH-DPA/ – Përkundër një vendimi të Gjykatës Kushtetuese, qeveria sllovake ka njoftuar se do t’i përmbahet rregullave të saj të rrepta të karantinës për udhëtarët e pavaksinuar që hyjnë në vend.
Dje policia kontrolloi certifikatat e vaksinimit të pasagjerëve në të gjitha pikat kufitare.
Sipas autoriteteve kufitare ”vetëm ata që janë vaksinuar kundër Covid-19 mund të hyjnë në vend pa iu nënshtruar një karantine 14-ditore”.
Politikanët e opozitës social-demokrate kishin kritikuar detyrimin e vaksinimit dhe i ishin drejtuar Gjykatës Kushtetuese, ku gjykata pezulloi shtrëngimin e rregullave për hyrjen në vendin e BE, në fuqi që nga 9 korriku.
”Derisa të sqarohet nëse trajtimi i pabarabartë i njerëzve të vaksinuar dhe të pavaksinuar nuk bie ndesh me kushtetutën, autoritetet duhet edhe një herë të respektojnë rregullat e zbatuara më parë”, njoftuan gjykatësit
Sidoqoftë, qeveria dhe autoritetet shëndetësore kanë vendosur që t’i shmangen këtij vendimi me një truk zyrtar ligjor.
Vendimi i gjyqtarit do të bëhet i detyrueshëm vetëm kur të futet në librin zyrtar të statutit, i cili zgjat disa ditë. /os/
