TIRANË, 15 maj/ATSH/ Pjesa më e madhe e fermave bujqësore në vendin tonë janë familjare dhe administrohen si të tilla.
Drejtoresha e Agjencisë së Zhvillimit Rural dhe Bujqësor, Frida Krifca tha se familjet bujqësore janë kujdestarët kryesorë të burimeve natyrore dhe luajnë rol vital socio-ekonomik, mjedisor dhe kulturor pavarësisht sfidave me të cilat përballen.
“Sot, në ditën ndërkombëtare të familjes, shpreh mirënjohjen për të gjitha familjet fermere e bujqësore që me forcë e vullnet, punojnë e krijojnë siguri e mirëqënie e na tregojnë sa shumë mund të arrijmë”, deklaroi Krifca.
Bujqësia është një nga sektorët më të rëndësishëm të ekonomisë, i cili kontribuon me 18-20 % të GDB dhe angazhon 35 % të fuqisë punëtore.
Sipas statistikave zyrtare prodhimet bujqësore janë rritur me mbi 20 %, ndërsa eksportet janë rritur me 145 %.
Sot produktet shqiptare shkojnë në 75 vende të botës. Këto rritje erdhën edhe si rezultat i investimeve të qeverisë në bujqësi. /j.p/
