PARIS – Bisedime Macron-Merkel-Zelensky për konfliktin në Donbass

PARIS, 16 prill /ATSH-DPA/ – Kancelarja gjermane, Angela Merkel, presidenti francez Emmanuel Macron dhe presidenti ukrainas Volodymyr Zelensky pritet të zhvillojnë bisedime përmes një video-konference për të diskutuar përkeqësimin e situatës në Ukrainën Lindore.

Franca ka si synim të arrijë një armëpushim në rajon.

Të pranishmit do të diskutojnë gjithashtu progresin e bërë në drejtim të zgjidhjes së konfliktit me mjete politike, sipas burimeve pranë qeverisë franceze.

Konferenca fillon në orën 15:00.

Frika po rritet për një ndezje të konfliktit për shkak të një grumbullimi të konsiderueshëm të trupave ruse përgjatë kufirit me Ukrainën.

Pjesë të rajoneve të Ukrainës Lindore të Donetsk dhe Luhansk përgjatë kufirit rus janë kontrolluar nga rebelët e mbështetur nga Moska për gati shtatë vjet.

Sipas vlerësimeve të OKB, më shumë se 13 000 njerëz janë vrarë në luftime që nga ajo kohë.

Pavarësisht nga vendosja e një armëpushimi, rreth 50 njerëz janë vrarë vetëm që nga fillimi i vitit. /os/

 

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.