Paloka në Hamallaj: Shiu i parë do fshijë 1 cm asfalt elektoral që po bën PS pas 8 vitesh

TIRANË, 14 prill /ATSH – I. Vata/ Drejtuesi politik i qarkut Durrës, Edi Paloka dhe dy kandidatët Manjola Luku dhe Erzen Laçi kanë zhvilluar një takim në Hamallaj, Durrës.

Gjatë takimit Paloka theksoi pakënaqësinë që ka krijuar tashmë Rama si kryeministër, gjë që reflektohet kudo në zonat periferike të cilat janë lënë në harresë, sidomos infrastruktura ku rrugët dhe kanalet po hapen vetëm ditët e fundit të fushatës duke menduar se do të mund të gënjejnë sërish qytetarët.

“A e ka dëgjuar kush Ramën të thotë më falni, apo këtë premtim nuk e mbajta dot? Jo! Çfarë ka bërë për 8 vite? Në rastin më të mirë na la në vendnumëro, por ka vende ku kemi bërë hapa pas. Tani është sulur, diku gërmon një rrugë, diku gërryen një kanal dhe ngul një shtyllë, me mendjen se do i gënjejnë sërish shqiptarët”, tha Paloka.

Gjithashtu ai e cilësoi betejën në këto zgjedhje, si një betejë përballë një qeverie e cila nuk u zgjidhi problemet qytetarëve, por u bë vetë problemi për ta. /a.a/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.