TIRANË, 18 shkurt /ATSH/ Nënkryetari i LSI, Petrit Vasili, u shpreh sot në një deklaratë për mediet se kryeministri Edi Rama po përdor pandeminë për fushatë, jo për të shpëtuar jetët e qytetarëve.
“Në këto ditë vërtet kritike për zhvillimin e pandemisë, të gjithë kanë qenë me sy e veshë për të kuptuar se ç’do të bëjë më në fund qeveria, do të lëvizë gishtin, a do të ikë nga kjo strategji tërësisht e gabuar dhe e dështuar për përballimin e saj, pasi dhjetëra jetë njerëzish po humbasin e mijëra, e mijëra të tjerë vazhdojnë të infektohen”, tha Vasili.
“Shqiptarët duhet ta kuptojnë që përballë kanë një pandemi, e cila është në duart më të këqija të mundshme, e cila është një histori dështimi tragjik, nga fillimi deri në fund, ku të gjitha masat shtrënguese nuk kanë krijuar asnjë ulje për pandeminë, por kanë krijuar një rritje të jashtëzakonshme e të pandalshme të saj, ku viktimat rriten”, theksoi Vasili.
Sipas tij, “me talljen dhe me mashtrimin e trastave me vaksina, Edi Rama po ofendon të gjithë shqiptarët”.
“Ky është shpërdorim i poshtër politik i pandemisë në dëm të shëndetit dhe të jetës së njerëzve”, tha Vasili.
Prandaj, nënvizoi ai, “25 prilli është dita e shpëtimit për çdo shqiptar e për çdo familje shqiptare, e për tërë Shqipërinë në tërësi”. /j.p/r.e/
