RIO DE ZHANEIRO, 6 janar /ATSH-DPA/ – Finalja e Copa Libertadores do të luhet pa spektatorë në tribunat e stadiumit legjendar ”Maracana” në Rio de Zhaneiro, më 30 janar, deklaroi konfederata e futbollit të Amerikës së Jugut, CONMEBOL.
”Finalja e turneut më të rëndësishëm të kontinentit të klubeve do të luhet pa tifozë”, tha një deklaratë e CONMEBOL.
Vendimi u mor së bashku nga CONMEBOL dhe federata braziliane e futbollit, CBF.
“Gjendja aktuale e pandemisë Covid-19, ende duke u zgjeruar në Amerikën e Jugut, nuk lejon që një ngjarje e kësaj madhësie dhe rëndësie të ndodhë me praninë e publikut, madje edhe me kapacitet të reduktuar”, sipas deklaratës.
Finalja do të luhet mes fituesve të ndeshjes Palmeiras-River Plate dhe Boca Juniors-Santos.
Copa Libertadores (ekuivalenti i Amerikës së Jugut i Ligës së Kampioneve) u ndalua gjatë fazës së grupeve, në mars, për shkak të pandemisë së koronavirusit dhe rifilloi në shtator./ /os/
