TIRANË, 9 tetor /ATSH/ Presidenti i Republikës, Ilir Meta dhe kryetarja e LSI-së Monika Kryemadhi kanë reaguar sot pas fjalës së Kryeministrit Edi Rama në Asamblenë e Partisë Socialiste.
“Unë e dua më shumë Margaritën se Monikën! E di pse? Se Monika braktisi Parlamentin kundër dëshirës dhe vullnetit tim, ndërsa Margarita në moshën 16-vjeçare shkruante në hartim: “Më pyet shpesh vëllai më i vogël: Motër përse na duhet Atdheu? Dhe unë i përgjigjem: Atdheu na duhet që të jemi të lirë!. Nuk ka Atdhe në botë pa Dëshmorë dhe Heronj o Spiropalist”, tha Meta.
Gjithashtu në reagimin e tij Meta tha se, “nuk bëj aktrime me historinë e kombit tim dhe familjes time! As politikë për vota”.
“Unë kam lindur në Çepan, 1000 metra mbi nivelin e detit dhe u jam shumë mirënjohës prindërve të mi. Shtëpia ku linda unë në 24 mars 1969 ishte spital partizan për Jugun e Shqipërisë. Në këtë shtëpi erdhën dhjetëra partizanë, pa këmbë e pa krahë. Në themelet e kësaj shtëpie edhe sot është gjaku i tyre”, theksoi Meta.
“Unë isha ndër udhëheqësit e Lëvizjes Studentore, por kurrë nuk e vura në diskutim gjakun e tyre. Se gjaku nuk bëhet ujë. Jam Ilir Meta dhe përballë do më keni gjithmonë!”, u shpreh ai.
Ndërsa kryetarja e LSI-së, Monika Kryemadhi në reagimin e saj u shpreh se, “LSI vazhdon të ngrihet sot në përgjegjësinë e asaj force politike që në 2010-ën u dha qytetarëve shqiptarë liberalizimin e vizave, atë të cilën Edi Rama prej vitesh e bllokonte”.
Krymadhi deklaroi se largimi i LSI nga koalicioni me PS në vitin 2017 ishte vendimi më mirë që ka marrë kjo forcë politike.
“Mos pranimi i LSI për vijimin e mandatit me Ramën është një nga vendimet më të mira që LSI ka marrë sepse kjo do të ndante njëherë e përgjithmonë zullumin dhe llumin që Rama kishte futur jo vetëm qeverinë shqiptare, por dhe PS-në dhe gjithë shqiptarët në varfërinë që vinte më pas”, tha Kryemadhi.
Ajo falënderoi të rinjtë dhe të rejat e LSI, të cilët tha Kryeamdhi, “i kanë kallur datën Ramën sa gjithë fjalimi i tij i kushtohej LSI dhe Monikës. Nuk po merrem me presidentin se presidenti ia kthen vetë përgjigjen”. /r.e/
