TIRANË, 27 shtator /ATSH/ 128 trajlerë me prodhime bujqësore janë eksportuar gjatë dy javëve të para të muajit shtator, nga qendrat e grumbullimit në Lushnjë dhe Fier.
Lindita Kondi, përgjegjëse në qendrën e eksporteve në Vlorë, tha për ATSH-në, “se ndonëse është fundi i sezonit për prodhimet e dyta në serra, domatet, speci, kastraveci e kungujt kryesojnë eksportet edhe në këtë periudhë, përkatësisht në sasitë 800 tonë, 630 tonë, 312 tonë dhe 130 tonë”.
“Gjatë periudhës 1 deri 15 shtator nga qendrat e grumbullimit bujqësor të Lushnjës dhe Fierit, janë nisur për eksport 128 kamionë trajlerë”, tha Kondi për ATSH-në.
Sipas saj, nga tregu i Lushnjës dhe i Fierit janë eksportuar 2 183 tonë prodhime bujqësore të freskëta në mbi 15 shtete të rajonit dhe BE-së, vetëm në dy javët e para të shtator 2020, shifër kjo 5% më e lartë se në të njëjtën periudhë një vit më parë.
Kondi tha se gjatë kësaj periudhe po eksportohen në sasi të konsiderueshme edhe produktet si lulelakër, bamje, karota, brokoli, pjepër e presh, krahas pemëtoreve si fiq, pjeshkë e fruta pylli.
