FRANCË – Greenpeace: Kompanitë europiane eksportojnë 41 pesticide të ndaluara

PARIS, 10 shtator /ATSH-AFP/ – Paraquat, dikloropropen, cianamide, këto pesticide të ndaluara në Bashkimin Europian për dëmet e tyre  janë eksportuar nga shoqëritë europiane jashtë kontinentit, denoncojnë sot organizatat “Greenpeace dhe “Public Eye”, që e drejtojnë gishtin në mënyrë të veçantë te kompania zvicerane “Syngenta”.

Në vitin 2017, drejtësia europiane ndaloi herbicidin Paraquat, i dyshuar për lidhje me sëmundjen e Parkinsonit. Dikloropropen, i përdorur për kultivimin e perimeve, është ndaluar që prej vitit 2007 në Bashkimin Europian dhe cianamidi, i përdorur në vreshta dhe për kultivimin e frutave, që prej vitit 2008.

“Megjithatë më shumë se 81 000 tonë të këtyre produkteve dhe pesticideve të tjera të ndaluara janë shitur jashtë BE në 2018”, sipas Greenpeace UK dhe Public Eye, të cilët skanuan “njoftimet e eksportit” të paraqitura nga kompanitë për të eksportuar këto substanca drejt vendeve ku ato janë të autorizuara.

“Çdo vit pesticidet e ndaluara në BE për shkak të toksicitetit të tyre të provuar transportohen nga toka europiane në vendet me rregullore më të dobëta”, sipas raportit.

“Nëse praktika është e ligjshme dhe e njohur, aktorët kryesorë në këtë tregti kanë qenë gjithmonë në gjendje të mbajnë aktivitetet e tyre prapa një veli errësire, të mbrojtur nga  sekreti i biznesit “, theksojnë OJQ-të.

Vendet nga të cilat eksportohen më shumë pesticidet të ndaluara në BE janë Britania e Madhe që kryeson, Italia, Gjermania, Holanda, Franca, Spanja dhe Belgjika./ /ec/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.