TIRANË, 10 shtator/ATSH/ Agjencia Kombëtare e Barnave dhe Pajisjeve Mjekësore është investimi më i ri i qeverisë shqiptare me laboratorë të standardeve europiane.
Kryeministri Edi Rama publikoi sot pamje se në çfarë gjendje ishte kjo agjenci dhe si u transformua duke vendosur standardin e munguar në strukturën e vetme të kontrollit të cilësisë së barnave dhe pajisjeve mjekësore në vend.
“Mirëmëngjes dhe me Agjencinë Kombëtare të Barnave dhe Pajisjeve Mjekësore, si ishte në kohën e atyre që sot duan të rikthehen se u shkatërrua shëndetësia, e si është sot, pas rindërtimit nga themelet, me mjedise e laboratorë të standardeve europiane për kontrollin e cilësisë së ilaçeve, ju uroj një ditë të mbarë”, – theksoi Rama.
Kjo agjenci tashmë disponon kushtet për të qenë një rregullator i mirëfilltë i tregut dhe shërbimit farmaceutik, nga produktet e importit tek prodhimi vendas, njësoj si simotrat në Europë.
Laboratorët e rinj të ndërtuar e pajisur janë garancia për të rritur sigurinë e barnave. Me ndërtimin e kësaj agjencie dyfishohet numri analizave dhe gama e tyre, duke realizuar analiza për kategori barnash që nuk janë kryer ndonjëherë, si p.sh., ato citostatike tumorale, imunoterapitë dhe gjithë kategoritë e tjera të produkteve farmaceutike, duke aplikuar procedurat e Farmacopesë Europiane, ku Shqipëria është tashmë anëtare.
Laboratorët e rinj, me pajisjet e reja, do të sjellin ndryshimin e pritshëm sa i përket kontrollit dhe cilësisë së barnave në treg. /z.t/j.p/r.e/
