BERLIN, 9 shtator /ATSH-DPA/ – Gjermania do të ulë kufirin e sipërm të personelit të saj ushtarak të vendosur në Irak nga 700 në 500, vendosi sot kabineti qeveritar në takimin e tij të përjavshëm në Berlin.
“Reduktimi i trupave vjen si rezultat i tërheqjes së avionëve gjermanë “Tornado”, që kanë kryer misione zbulimi mbi Lindjen e Mesme, si pjesë e kontributit të vendit në luftimin e milicisë terroriste të Shtetit Islamik”, saktësoi ministrja e Mbrojtjes, Annegret Kramp-Karrenbauer, duke shtuar se Gjermania mbetet e vendosur për të ndihmuar Irakun.
“Shteti Islamik po vazhdon aktivitetet e tij terroriste, pavarësisht pandemisë së koronavirusit. Presioni ushtarak duhet të vazhdojë”, tha ajo pas takimit.
Ajo vuri në dukje dëshirën e qeverisë irakiane për të zgjeruar trajnimin e personelit të sigurimit irakian nga misioni i NATO-s në rajon, ku Gjermania do të japë një kontribut të duhur për këtë./ /ervo/
