TIRANE, 20 qershor/ATSH/- Ministri në Detyrë për Europën dhe Punët e Jashtme, Gent Cakaj deklaron se mbështetja masive në zgjedhjet për listën e Luginës së Bashkuar është e një rëndësie të patjetërsueshme.
Një ditë përpara zgjedhjeve në Serbi, Cakaj thekson se në Luginën e Preshevës duhet të ketë vetëm një faktor politik.
Ministri nënvizon se partitë politike shqiptare në Luginën e Preshevës që vendosën që në zgjedhjet parlamentare të 21 qershorit të garojnë me një listë të unifikuar zgjedhore, gëzon mbështetjen e plotë të Shqipërisë dhe Kosovës.
“ Edhe njëherë: Pjesëmarrja e lartë e mbështetja masive në zgjedhjet për listën e Luginës së Bashkuar është e një rëndësie të patjetërsueshme! PO, PO: ekzistojnë edhe mendime ndryshe edhe shumë parti politike, por duhet të ketë vetëm një faktor politik në Luginën e Preshevës! Kjo listë gëzon mbështetjen e plotë të Republikës së Shqipërisë dhe Republikës së Kosovës: kjo duhet të jetë pikëfillimi i një ndërmarrje të përbashkët për Luginën! Forca vëllezër – bashkimi bën fuqinë “, deklaron Cakaj. /a.g/
