VJENË, 25 maj /ATSH-AFP/ – Presidenti austriak, Alexander Van der Bellen ishte sot në titujt kryesorë të gazetave në vendin e tij, pavarësisht ndjesës, pasi shkeli kufizimin e vendosur nga qeveria për luftën kundër koronavirusit.
I përshkruar si një “mëkatar” përballë virusit nga tabloidet, kreu i shtetit u kontrollua nga një patrullë policie, ndërsa ai ishte ulur në tryezë menjëherë pas mesnatës në mëngjesin e së dielës me gruan dhe dy miqtë e tij në tarracën e një restoranti në qendër të Vjenës pas kohës së mbylljes së detyrueshme, i vendosur në orën 23:00.
“Unë dola për herë të parë që nga mbyllja me dy miq dhe bashkëshorten time”, theksoi Van der Bellen.
“Ne humbëm nocionin e kohës ndërsa bisedonim. Sinqerisht më vjen shumë keq. Ishte një gabim”, shtoi ai.
Austria ndërmori një bllokim të ashpër dhe strikt për të luftuar koronavirusin e ri në mes të marsit, por i hoqi gradualisht shtrëngimet që prej mesit të muajit prill, ndërkohë që numri i infektimeve mbetet i ulët.
Javën e kaluar, restorantet dhe kafenetë janë rihapur, por duhet të respektojnë rregullat detyruese, si mbyllja në orën 23:00./ /ec/ a.jor.
