ATHINË, 7 mars /ATSH-MIA/ – Do të donim shumë të shihnim vendim pozitiv nga Këshilli Europian për hapjen e negociatave me Shqipërinë dhe MV, pasi konsiderojmë se dy vendet e meritojnë atë, deklaroi sot zëvendësndihmëssekretari i Departamentit amerikan të Shtetit për Europën dhe Euroazinë, Matthew Palmer në Forumin Ekonomik të Delfit në Athinë.
Lidhur me procesin e zgjerimit të BE-së dhe nëse pret përgjigje pozitive për një kohë të shkurtër, Palmer deklaroi se mbetet në qëndrimin se refuzimi i hapjes së negociatave tetorin e vitit të kaluar ishte një gabim historik.
”Lajmi i mirë është se ekziston mundësi që të përmirësohet ai gabim në mars, në takimin e Këshillit Europian. Shumë do të donim të shihnim vendim pozitiv nga ky këshill për hapjen e negociatave me Shqipërinë dhe MV. Konsiderojmë se që të dy vendet e meritojnë atë”, theksoi ai.
”Zbatimi i Marrëveshjes së Prespës ishte kyç për përparimin e Maqedonisë së Veriut drejt anëtarësimit në BE.
”Gjithashtu, presim që Maqedonia e Veriut të shkojë përpara në rrugën drejt NATO-s. Mendoj se këtu mund të presim përparim shumë të shpejtë. Do të jetë ditë e shkëlqyer, diçka për të cilën punuam shumë vite”, deklaroi Palmer./ a.jor.
