TIRANË, 17 shtator/ATSH/ “Stafetë lapidaresh” ishte aktiviteti i organizuar sot në Gjirokastër në kuadër të përkujtimit të 75-vjetorit të çlirimit të qytetit të gurtë.
Në këtë aktivitet mori pjesë prefekti i qarkut Gjirokastër, Astrit Aliaj, kryetari i bashkisë Gjirokastër Flamur Golemi, kryetari i Komitetit të Veteranëve Gjirokastër Hodo Liço, si dhe përfaqësues të institucioneve vendore, veteranë e qytetarë.
Ky aktivitet u organizua nga bashkia Gjirokastër në bashkëpunim me Qendrën Kulturore të Fëmijëve “Fato Berberi”.
Aktiviteti festiv u shtri në të gjithë qytetin, duke nisur nga busti i Heroit të Popullit Muzafer Asqeriut dhe vijoi më pas në dy lapidaret që ndodhen në lagjen Palorto, Gjirokastër.
Ceremonia përkujtimore në lapidarin e dëshmorit Pertef Kokona, u shoqërua me vendosjen e luleve si dhe me këndim të këngëve patriotike në nder të dëshmorëve të rënë.
Në fjalën përshëndetëse, Prefekti Aliaj theksoi rëndësinë e nderimit dhe respektimin të veprës e kontributit të dëshmorëve në çlirimin e qytetit të Gjirokastrës, veçanërisht që ky vit përkon edhe me vitin jubilar të 75-vjetorit të çlirimit të Shqipërisë.
Ai shprehu mirënjohjen dhe respektin për të gjithë dëshmorët dhe heronjtë e Gjirokastrës, të cilët dhanë jetën jetën në shërbim të Luftës Antifashiste Nacionalçlirimtare si epopeja më e lavdishme në historinë e popullit tonë.
Prefekti Aliaj theksoi se është detyrë e jona që të përcjellim brez pas brezi vlerat e bijve dhe bijave që dhanë jetën e tyre për çlirimin e atdheut tonë./k.s/j.p/
