TIRANË, 23 prill /ATSH/ – Ministrja e Arsimit, Sportit dhe Rinisë, Besa Shahini ka pasuruar bibliotekën e vogëlushëve të Shtëpisë së Fëmijës “Zyber Hallulli” në Tiranë.
“Pas yjeve dhe fëmijëve, çka i jep bukuri botës, është libri”, ka thënë ministrja ndërsa ka zgjedhur që në ditën ndërkombëtare të librit të dhurojë tituj të rinj librash për bibliotekën e vogëlushëve “Zyber Hallulli”. Sipas saj, kjo qendër rezidenciale është ndër të paktat vende ku mund t’i gjesh bashkë yjet, fëmijët dhe librin.
“Dhe Shtëpia e Fëmijës “Zyber Hallulli” është ndër të paktat vende ku mund t’i gjesh të tria bashkë. Ndaj menduam që Dita Ndërkombëtare e Librit ta gjente të pasuruar me tituj të rinj bibliotekën e vogëlushëve”, – ka theksuar Shahini ndër të tjera.
Gjatë vizitës së saj, ajo ka takuar fëmijët dhe është njohur me ambientet e leximit të tyre. /z.tosku/ /a.g/
