TIRANË, 11 prill /ATSH-Maela Marini/ – “Progresraporti në fund të majit do të rekomandojë hapjen e negociatave pa kushte për Shqipërinë”.
Kështu deklaroi sot Kryeministri Edi Rama në Kuvend ku po shqyrtohet raporti i vitit 2018 lidhur me ecurinë e procesit të integrimit të Shqipërisë në Bashkimin Europian.
Rama iu referua deklaratës së pak ditëve më parë të komisionerit Johannes Hahn, në Komisionin e Politikave të Jashtme të Parlamentit Europian, i cili theksoi pa asnjë ekuivok se, “Shqipëria ka ecur përpara në mënyrë të qëndrueshme dhe se progresraporti, i cili do të publikohet në fund të muajit maj, do të rekomandojë pa kushte hapjen e menjëhershme të negociatave për Shqipërinë”.
Rikonfirmimi i i rekomandimit pa kushte për të dytën herë nga ana e Komisionit, sipas Kryeministrit Rama, është edhe rikonfirmim pa kushte i një të vërtete shumë të thjeshtë, që Shqipëria i ka plotësuar të gjitha detyrat për të çelur negociatat për anëtarësimin në BE.
Por, kreu i qeverisë theksoi se duhet të kuptohet nga të gjithë që “çelja e negociatave është një vendim që merret nga Këshilli Europian, i përbërë prej gjithë kryeministrave dhe presidentëve të vendeve anëtare, bazuar në rekomandimin e Komisionit, por edhe si rezultat i dinamikave të brendshme në vendet anëtare”.
“Kjo do të thotë se nëse raporti i Komisionit ndërtohet mbi kritere ekskluzivisht teknike, duke verifikuar një më një kryerjen e të gjitha detyrave të përcaktuara për çeljen e negociatave, vendimmarrja në Këshillin Europian është rezultat i debatit të brendshëm në atë Këshill, që i tejkalon kriteret teknike, dhe ku subjektiviteti politik i vendeve ka rolin e vet”, – tha Rama. /a.g/
