TIRANË, 29 mars/ATSH/- Fëmijët e kryeqytetit prej dy vitesh kanë tashmë një qendër të re Kombëtare Kulturore.
Një investim i qeverisë shqiptare kjo qendër e ndodhur në zonën pranë Kinostudios, ofron prej dy vitesh një mundësi argëtimi dhe pasurimi shpirtëror për fëmijët e kryeqytetit.
Nga qendra e vjetër, ku vogëlushët hidhnin hapat e para drejt artit në kushte të vështira, nuk ka mbetur asnjë gjurmë.
Vendin e mykut, lagështisë dhe ajrit të ftohtë, e ka zënë një ambient i ngrohtë e bashkëkohor, me salla të dedikuara për çdo kurs, me dhoma zhveshjeje e madje edhe sinjalistikë të detajuar.
Kryeministri Edi Rama uroi sot mirëmëngjes me pamjet e transformuara të kësaj qendre.
“Mirëmëngjes dhe me këtë pasqyrë të dallimit mes kujdesit për fëmijët dje dhe sot, ju uroj një ditë të mbarë”, thekson Rama.
Këtë qendër e frekuentojnë fëmijët që kanë dëshirë të hyjnë në labirinthin magjik të tingujve, të ngjyrave dhe të fjalës. Fëmijët e moshave të ndryshme ushtrojnë në këtë qendër pasionet e tyre në piano, kitarë, balet apo pikturë, por edhe argëtohen në ambientet moderne të qendrës.
Dijenitë e marra, fëmijët i shfaqin në organizime të ndryshme të kësaj qendre. /k.s/ /a.g/
